Cerpen: Olih : DG.Kumarsana BERUNG

Bakat kenehang, krana metatu abedik cara bintilan. Bintul-bintul barak ane sing suud-suud bakat gesges dadine ngedenang lan merupa berung. Bengu sing kodag-kodag yan adekin. Besil dini-ditu. Blenget gati.
“Aruh....!! tiang ja suba kenjel ngarawat tatun tiange ene, apa ja dadine buin mani tiang sing nawang. Cutetne tiang sing ja nyak ngerunguang buin ” Luh Ayu ngemigmig sambilange nyebak. Pisaga ane nelokin pada jejeh. Makejang anake pada jejeh. Apa sing lakarang jenis tatu keto bisa ngalimbak wiadin ngranang gerubug di desa. Anake makejang pada ngrimikang.
Sabilang Luh Ayu liwat di aep pisagane ane pada mepunduh bruak-bruak ngorta, nadak makejang pada mendep sing ada pesu munyi sambilange nekep cunguh. Ngenah sajan ngewada. Saru apa ulian jejeh ngalimbak panyakitne ento, apa krana demen ugig jak timpal.
“Suud monto nyebak. Tusing pragat ulian nyebak dogen. Pareksaang awake malu ka dokter. Ngidih pengubadan lan resep apang tusing ngancan ngedenan, lamun dadi tagih ubade ane maal pang enggal seger” Ratih , timpalne puru di kantor ngorahin. Nyelag ngojok ka umahne.
”Suba. Suba!! Suba kaperiksa baan dokter. Doktere ngemaang ubad ane meranen tur maal gati. Delokin ja ditu,” Luh Ayu masaut sambilange nujuhin kaputan ubad uli klip plastik di duur mejane. Limane iteh kaskas-keskes.” Sabilang minggu tiang luas ka dokter, kewala tusing ada perubahan nyang abedik. Tiang tandruh apa sujatine sakit tiange ene? Ane sangat bakat kenehang buin yaning ubadin ngancan ngedenang tatune lan nyakitin sajan. Nyen Sujatine belog? Doktere apa panyakite. Asanang doktere mirip ane belog tusing ngidang ngebaang ubad penawar ane meranen. Mirib tusing ja ada ubad meranen jaman jani anggon ngubadin tatu cerik nganti dadi berung kakene” ia ngrumuk sambilanga misuhin doktere. Panyakitene padidi masih kena pisuh. Kadirasa blasak dogen kenehne. Receh sajan-sajan.

”O, ento madan korengan, Luh ” kadek Doglong mapi-mapi nedasang, kenehne suba ririh pisan krana ulian nlektekin panyakit jenis keto bisa tawang kenken kone kaidupan Luh Ayu dugase cerik yan demen maplalian di endute, wiadin maplalian di tukade ane bek misi luu muah tain jaran, konden buin tain ubuh-ubuhan ada ane ngenceh lan meju ditu, sing tawang masih di tukade ada bangken cicing kampih. Kadek Doglong nyatuang timpalne dugase cerik ane demen maplalian nyanyad patuh ja cara panyakitene Luh Ayu jani. Mula perlu seken-seken runguang! Sing dadi campahang sajan gejala-gejalane ane mara ngenah.Tusing ja maarti apa-apa, Bes ngenah campah, api ja berud abedik, sakewala sanget ngranaang lek lan ngulgul tur likad nyemak gae sewai-wai di kantor. Kengken sing likad, sabilang ia ngomong ajaka relasi bisnisne kanti misi ngengkebang lima ane korengan. Makejang timpal-timpal lan relasi bisnisne di kantor mretenin. Ada ane teleb gati mretenin,kadirasa likad Luh ayu Kenken anake ngelah olas asih nepukin limane buka keto. Ngelek hati api ke nganggo baju ane melah lan maal-maal, lakar sing ja nyidang ngengkebin korengane.
” Ento madan berung .” bli Putu milu masih ngimbuhin nedasang.
”Nah, api ja koreng jawata berung apa kone bedane? Lakar kanti tua naanang sakit buka keto?” kadek Doglong nungkasin. Krana ento lakar ngusak bayun relasi-relasi bisnisne di kantor. Lamun ada anak muani ajak Ni Luh Ayu, kenken carane? Bli Putu nlektekin matane i kadek. Seken-seken!. Ngujang ia sangat ngerunguang sakitne Ni Luh Ayu? Ah, miribang I Kadek Doglong ada keneh ajake Ni Luh Ayu. Nganti kaketo carane mretenin. Tresna pisan abetne.
Anak muani ajake dadua ento pada mendep. Luh Ayu ngentas sambilanga nekepin map di limane ane ngenah berung. Ebo pengit ngebekin ruangan perkantorane.
“Suud ngomongang timpal,” bli Putu ngorahin Kadek Doglong. Ngenah sajan munyine misi ngelonin Ni Luh Ayu.Kenken sing padalem lamun nepukin Luh Ayu cara anak ruyud majalan sambilange tekol. Ngenah likad di paninggalane.
Sabilang peteng Ni Luh Ayu malik-malikang palet surat kabar ane suba makelo sing kabaca. Tuah iseng dogen nyen nawang ada pabligbagan abedik atawi resep manjur pang sing ja nganti tuyuh kemu-mai ka dokter kulit. Sujatine pabrik ubade ento mirib ia ”fiktif” indikasi-ne, keto kenehne ane majalan ”ekstrem”. Makejang ubade ane kawedar di pasaran, makejang ubade ane kaadep di apotek lan makejang jenis ramu-ramuan jamu ane kaadep di toko-toko ubad ia ngorang raos bogbog. Tusing ada meranen. Mogbog mengkeb-metapel di durin karirihan iklan dogen! Iklan ubad-ubadan pada pagedenang kamuat di surat kabar wiadin majalah-majalah sujatine ento ngedengang muan-muan anake luh jegeg-jegeg dogen, bentuk-bentuk batis ane luwung, sakewala sing ja nyak ngedengang kenken kone proses berlangsungne ngubadin panyakite uli mara kena kanti nyidang seger. Ah, uluk-uluk ento. Apang nyak anake meli barangne! Bes ngenah bogbogne! Bobab sajan! Ento madan ”penipuan publik”, ragragan “komoditi” ajak nak ngelah kebrebehan. “Komoditas konsumen” anake ane sayan gelem muah ja kapercaya, yadiastun ajine maal, ngemigmig sambilange gedeg Luh Ayu padidiane. Med sajan naenang berungne, memeka sing suud-suud ,mekelo-kelo ningalin ibane ngeranaang kenehne sebet. Nah, ne ia di palet kesehatan ada kone pabligbagan ubad penemuan baru panyakit diabetes, kenken carane ngae seger ane melah, aluh lan mudah nganggo buncis. Dadi anggon lakar jukut. Dadi masih ngae olah-olahan kacampur baan wortel abedik anggon nyegerang sakit mata. Ni Luh Ayu ngenggalang nelpun timpalne, ia menyet memekne I Neni enu nyakit diabetes. Suba ngantos stadium telu lan aminggu ane maluan “urgent” parintahe dokter bedah maang tindakan, abesik kacing batisne amputasi krana suba membusuk. Masisa tulang kabungkus baan kulit abedik. Biasane penyakit keto lamen ja suud operasi, lakaran makelo tuhne, asanan keweh uas. Tiban-tibanan bonyok ngancan menekang nuju matan batisne nganti ka paane. Jejeh lamun ngenehang dugas ninggalin I Neni sebet nyatuang kakewehan memekne. Ni Luh Ayu masih maan milu ngenemin dugase operasi memekne I Neni di arep kamare bedah minor rumah sakit umum. Keto luung abetne Luh Ayu enu masih inget kakewehan timpalne yadiastun ia patuh ngelah keweh. Ento madan ngedum keweh bareng-bareng. Milu masih bincuh nulungin timpal.
”Ada masih ane lebian parah sakitne katimbang tiang,” Ni Luh Ayu molmol sambilange ngolesin berungne baan salep lantas ngusap-usapin baan kapas cotton bud. Adan salepe nyzoral cream, doktere ngorahang ubad meranen, ubad “high class”. Apa kaden madan keto, Ane penting uas berunge.
Inget dugase belabar gede di desa, yehe menek tegeh kanti neked bangkiang ukuran anak kelih. Pada nyapnyap makejang. Yehe menek ka umahan. Makejang pada sepanan ngisidang lan bincuh ngajang isin perabot umah. Nyap-nyap tekening sekayane sowang-sowang. Tusing suba ngenehang apa dogen ane kampih di yehe ento. Luu , bangken kuluk nganti kompor lan makejang isin paone pada kampih. Gede pesan yehe apa buin warnane coklat macampur selem, apa kaden lakar sinah dadi sumber panyakit kulit, jalir, demam berdarah ulian legune lakar pada kemu-mai lan liu lakaran anake pada ngencit, ngutah mising. Pisaga makejang sambrag pada rarud. Blingsatan malaib kemu-mai paling. Konyangan paling. Sajan-sajan enteng kenehe.
Suba liwat abulan sagetang Ratih teka ka umahne Ni Luh Ayu nekedang gatra anyar sambilange ngelkel kedek.
”Apa ada gek?” Ni Luh Ayu ngaukin Ratih baan ”gek” ulian ja muane jegek sakadi artis sinetron kesayangan Luh Ayu ane sawai pabalih di televisine.
”Jani pisagane makejang luh-muani, teruna-bajang, cenik-kelih telah pada kaskas-keskes. Ada ane berung gede nganti bongkeng, ada masih ane bonyok.”
“Dadi keto?”
“Tinggalin ja I Galuh Bonjor jani nganti ka song jitne berung,” kaukine Galuh Bonjor ulian bungutne cara bungut bemo kewala demen ugig, nyadcad timpal.
“Dadi nawang ?”
“Tolih ja pesu makejang pada kaskas-keskes.!!”
”Apa ulian tiang?”
Ratih sing masaut, laut magedi ngalahin Luh Ayu bengong padidian.
Jani Pisagane di Desa makejang pada kena berung. Telah kas-kas kes-kes. Sabilang ngaliwat tepukin ada ane ngeskes lima,ngeskes batis,ngeskes jit sambilange memisuh. Misuhin belabar ane suba liwat. Ulian yeh bandange ene makejang dadi kakene. Panyuud blabar dadi mesuang gering agung. Padadine gerubug desane.
Jani ja suba pada suud anake makejang ngrimikang Luh Ayu. Sakewala jani makejang pada ngrimikang dewekne padidi. Ngenehang sakitne padidi. Jani ja suba pada suud makejang anake pada nekep cunguh sabilang nepukin Luh Ayu ngentas. Sakewala jani makejang pada nekep cunguh lan bungutne padidi. Ngenehang berungne padidi.
Ane sing suud-suud ngelkel kedek tuah ja I Ketut Aget, krana dugase blabar gede ento ia mula luung tongos umahne di duuran pisagane ane lenan. Tusing celepin yeh gede. Ngelkel sing suud mekadi nepukin timpalne liu pada kaskas-keskes sambilange nyelek jit. Mimih dewa ratu!! Pedalem pisan pisagan tiange. Tusing kaunduk baan nulungin krana sing pedas baan ubad-ubadan.